ភ្នំពេញ៖ សហចៅក្រមស៊ើបអង្កេតនៃអង្គជំនុំជម្រះវិសាមញ្ញក្នុងតុលាការកម្ពុជា បានចេញសេចក្តីសម្រេច បង្គាប់ឱ្យយកសំណុំរឿង ០០៤ ប្រឆាំងនឹង យឹម ទិត្យ ទៅបោះត្រានិងដាក់បញ្ចូលក្នុងបណ្ណសារដ្ឋាន ដែលបានន័យថាលោក យឹម ទិត្យ នឹងមានសេរីភាពជាធម្មតានិងលែងមានសំណុំរឿងបន្តទៀត។
អ្នកនាំពាក្យសាលាក្ដីខ្មែរក្រហម លោក នេត្រ ភក្រ្តា បានបញ្ជាក់ប្រាប់EAC News ថាចាប់ពីពេលនេះទៅលោក យឹម ទិត្យ នឹងលែងមានសំណុំរឿងប្រឆាំងលោកទៀតហើយដែលលោកអាចរស់នៅធម្មតាដូចប្រជាជនទូទៅ។
លោកថា៖ «សំណុំរឿងគាត់អត់មានបន្ត បានន័យថាគាត់អាចរស់នៅបានដោយធម្មតា»។
ការបង្គាប់របស់សហចៅក្រមស៊ើបអង្កេតបិទសំណុំរឿង០០៤ ប្រឆាំងលោក យឹម ទិត្យ ធ្វើឡើងតែ១ថ្ងៃប៉ុណ្ណោះ ក្រោយអង្គជំនុំជម្រះតុលាការកំពូលនៃ អ.វ.ត.ក បានចេញសេចក្តីសម្រេចបដិសេធសំណើរបស់សហព្រះរាជអាជ្ញាអន្តរជាតិបញ្ជូនរឿង ០០៤ ប្រឆាំងនឹង យឹម ទិត្យ ទៅជំនុំជម្រះ។
លេខាតំបន់១៣ (ខេត្តតាកែវ) ក្នុងរបបកម្ពុជាប្រជាធិបតេយ្យ យឹម ទិត្យ ត្រូវបានសហព្រះរាជអាជ្ញាអន្តរជាតិបានចោទប្រកាន់និងបញ្ជូនទៅជំនុំជម្រះពីអំពើប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្រ្គាម និងបទល្មើសថ្នាក់ជាតិកាលពីថ្ងៃទី២៨ ខែមិថុនា ឆ្នាំ២០១៩ ខណៈសហព្រះរាជអាជ្ញាជាតិសម្រេចលើកលែងការចោទប្រកាន់៕